ఐపీఎల్ 2025 సీజన్ ప్రారంభ మ్యాచ్‌లో ముంబై ఇండియన్స్ తరపున ఆడిన కేరళకు చెందిన యువ లెఫ్ట్-ఆర్మ్ రిస్ట్ స్పిన్నర్ విఘ్నేష్ పుత్తూర్ తన అరంగేట్రంలోనే అద్భుత ప్రదర్శనతో అందరి దృష్టిని ఆకర్షించాడు. చెన్నై సూపర్ కింగ్స్‌తో జరిగిన ఈ మ్యాచ్‌లో విఘ్నేష్ 3 వికెట్లు పడగొట్టి, తన జట్టుకు ఆశలు చిగురించేలా చేశాడు.
ఈ యువ ఆటగాడు ఇంపాక్ట్ ప్లేయర్‌గా రోహిత్ శర్మ స్థానంలో ఎంఐ తరపున బరిలోకి దిగాడు. తన తొలి ఓవర్‌లోనే సీఎస్కే కెప్టెన్ రుతురాజ్ గైక్వాడ్ (విల్ జాక్స్ చేత డీప్‌లో క్యాచ్) వికెట్‌ను తీసి గొప్ప రికార్డు సృష్టించాడు. ఆ తరువాత శివమ్ దూబే, మరియు దీపక్ హుడాలను పెవిలియన్‌కు చేర్చి, తన 4 ఓవర్లలో 32 పరుగులకు 3 వికెట్లు తీసుకున్నాడు.
24 ఏళ్ల విఘ్నేష్ పుత్తూర్ కేరళలోని మలప్పురం నుంచి వచ్చిన ఈ స్పిన్నర్‌ను ముంబై ఇండియన్స్ రూ. 30 లక్షల బేస్ ప్రైస్‌కు సంపాదించింది. ఈ యువ ఆటగాడు ఇప్పటివరకు కేరళ సీనియర్ జట్టుకు ఆడలేదు కానీ అండర్-14 మరియు అండర్-19 స్థాయిలలో ప్రాతినిధ్యం వహించాడు. ప్రస్తుతం అతను కేరళ క్రికెట్ లీగ్‌లో అలప్పీ రిప్పల్స్ తరపున ఆడుతున్నాడు.ఈ యువ స్పిన్నర్ తమిళనాడు ప్రీమియర్ లీగ్‌లో కూడా ఆడాడు.
ఆటోరిక్షా డ్రైవర్ కుమారుడైన పుత్తూర్, మొదట్లో మీడియం పేస్ బౌలింగ్ చేసేవాడు. స్థానిక క్రికెటర్ మహమ్మద్ షెరీఫ్ సలహాతో లెగ్ స్పిన్‌ను ప్రయత్నించమని చెప్పడంతో అతని కెరీర్ మలుపు తిరిగింది. ఆ తర్వాత త్రిస్సూర్‌కు వెళ్లి, సెయింట్ థామస్ కాలేజీ తరపున కేరళ కాలేజ్ ప్రీమియర్ టీ20 లీగ్‌లో పెద్ద స్టార్‌గా మారాడు. ఈ ఏడాది ప్రారంభంలో, అతను దక్షిణాఫ్రికాలో జరిగిన ఎస్ఏ20 కోసం వెళ్లాడు, అక్కడ అతను ఎంఐ కేప్ టౌన్‌కు నెట్ బౌలర్‌గా పనిచేశాడు.
ఇతర ఎండ్ నుంచి వికెట్లు పడుతున్నప్పటికీ, రవీంద్ర 45 బంతుల్లో రెండు ఫోర్లు, నాలుగు సిక్సర్లతో 65 పరుగులతో నాటౌట్‌గా నిలిచి, సీఎస్కేకు ఉత్కంఠభరిత విజయాన్ని అందించాడు. 2012 నుంచి ఐపీఎల్ సీజన్ తొలి మ్యాచ్‌లో గెలవని ఎంఐకి, డెబ్యూటంట్ పుత్తూర్ 3-32 స్పెల్ ఈ మ్యాచ్‌లో అతిపెద్ద సానుకూలాంశంగా నిలిచింది.
విఘ్నేష్ పుత్తూర్ గురించి ముంబై ఇండియన్స్ బౌలింగ్ కోచ్ పరాస్ మాంబ్రే మాట్లాడుతూ, “విఘ్నేష్ తన ప్రతిభను ట్రయల్స్‌లోనే చూపించాడు. అతని బంతి వేగం తక్కువ ఉన్నప్పటికీ, బ్యాట్స్‌మెన్‌లను మోసం చేసే సామర్థ్యం అతన్ని ప్రత్యేకంగా నిలబెట్టింది,” అని ప్రశంసించాడు.
ముంబై ఇండియన్స్ ఈ మ్యాచ్‌లో ఓడినప్పటికీ, విఘ్నేష్ పుత్తూర్ వంటి యువ ప్రతిభను వెలికితీసినందుకు జట్టు సంతోషంగా ఉంది. ఈ కేరళ స్పిన్నర్ ఐపీఎల్ 2025లో తన ముద్ర వేసేందుకు సిద్ధంగా ఉన్నాడని అభిమానులు ఆశిస్తున్నారు